注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

鹞语世界

想飞,那爱的情线却把我牵住……因为,我深深眷恋这片土地……

 
 
 

日志

 
 

孽世生(长篇评弹连载 初稿)  

2014-10-24 09:36:03|  分类: 默认分类 |  标签: |举报 |字号 订阅

  下载LOFTER 我的照片书  |

        孽世生——一代名妓柳如是

第一回(赎身)

上表:中国古代格妓女主要有三种等级,第一等,琴棋书画写诗作词馋要会,挨种妓女专门陪侍官员、富商、富家子弟挨种人,第二等,文化勿被要好,蛮有姿色,寻俚笃格主要是小商人搭平民百姓,第三等,又姆拨文化又姆拨姿色,寻俚笃格主要是勿赅铜钿格穷人。明朝格时光,勒海吴江盛泽有一家妓院,叫归家院,里响格妓女馋是第一等,其中有一个妓女叫杨爱,姿色出众,才艺不凡,达官显贵当中知名度蛮高。杨爱就一直交际勒官员、富商、文人当中。到杨爱十六岁格一年,回盛泽祭祖格尤总兵点名杨爱陪俚去游石湖,杨爱一开始勿肯去,老鸨秋娘横劝竖劝,总算答应哉。但是还分到约定格时光,归家院另外一个艺妓月娘,勒海陪侍尤总兵格时光,受辱投湖自杀。挨桩事体弄得归家院格姊妹对姓尤格杀千刀又恨又怕,约定情愿死也勿去陪侍俚。现在,尤总兵约杨爱格日脚就要到哉,杨爱去求老鸨秋娘。娘啊!我已经存好兹一点私蓄,按照你老照格承诺,让我以原身价赎身,放我走吧!娘啊!你就成全我格心愿吧!头一低,噗,跪到地浪。

下表:秋娘勿好讲。我小时光屋里穷,爷娘拿我卖拨老鸨,跟兹老鸨学琴棋书画唱,十六岁就开始接客。我哪哼勿晓得你格心情,我也想让倷早点赎身,寻一个好男人嫁脱。但是我现在好勿容易屏到老鸨,每年勒海倷身浪赚着格铜钿要几花,放倷走有点勿舍得。要去拿杨爱搀起来。囡唔,倷起来,倷起来。

上表:杨爱犟勒地浪勿起来。赛过小和尚念经。阿娘,倷勿答应我就是勿起来,倷勿答应我就是勿起来……还要拿手甩甩开,嗯——倷勿答应我就是勿起来。

下表:囡唔啊,挨个勿是小事体,伲好好叫商量商量。你起来。

上表:杨爱立起来。丫头阿娟跑进来,捧好一只盒子拿拨秋娘。格个断命总兵,派人送定金来哉。对牢盒子斜好眼睛一闭,赛过拿格骨灰盒子。爱娘,倷勿好去格喔。

下表:秋娘捧好盒子一动勿动。

上表:阿娟讲哉。送礼格人问,是俚笃派轿子过来接,还是自家坐轿子过去?

下表:杨爱火得勿得了。倷去跟俚讲,我勿去。

上表:哦。阿娟朝外头走哉。

下表:慢慢叫。秋娘要紧拿阿娟喊牢。就讲谢谢尤总兵,不要派轿子来接格。

上表:杨爱走到秋娘身边。好姆妈,我老早就讲哉,情愿死也勿去格。

下表:让我想想看,你先回房间休息吧。秋娘回到自家房间里响,关好门,盖勒枕头浪。眼泪水流出来。想想自家跟杨爱一样,从小被爷娘卖拨妓院,现在世界浪只有杨爱赛过自家人。我本来想到倷十八岁格时光,寻一个好人家,拿倷嫁脱,我也拿归家院关脱,过清静日脚。分想着会得碰着格姓尤格,按照倷格脾气,喊倷去陪,倷肯定要死脱格。囡唔啊囡唔,倷真格作孽。哎——秋娘从床浪坐起来,揩揩眼泪水。去寻杨爱。

上表:杨爱坐勒凳子浪气得要命。

下表:秋娘跑进去捧牢杨爱格面孔。囡唔啊,我答应你格要求。

上表:杨爱一吓。勒海想我肯定听错脱哉,秋娘勿答应我格要求。娘啊,姆妈啊,倷拿我养大,教我琴棋书画,诗词文章,倷格恩情我永远会记牢。但是倷要我去陪姓尤格,原谅我勿能从命。伲下世再做母女,来报答倷格养育之恩。要立起来拿头撞台角。

下表:秋娘要紧两只手揿牢杨爱肩架。囡唔,我答应你格要求,我让倷赎身。

上表:啥么事啊?啊是真格?看看秋娘表情蛮严肃,勿是勒海开玩笑。抱牢秋娘格肩架,哇——啊——哭哉。哭兹一歇,杨爱慢慢叫放脱秋娘,到自家衣橱边浪,拿出一只描金格盒子,端拨秋娘。我格身价铜钿,姆妈,倷收好吧。

下表:秋娘拿过盒子看看,放勒台子浪。等我拿倷格张契约寻出来再讲吧。说完走出去哉。杨爱突然觉着人一阵轻松,恨勿得马上拿着格张卖身契,哼碎脱,再丢勒地浪用脚踏烂。挨只描金礼盒,是汪汝谦先生瞒脱秋娘送拨俚格,杨爱问兹汪先生几次,为啥体要送格样贵重的礼物,汪先生一直笑笑勿回答。有一次杨爱盯牢俚问,汪先生讲,倷总有一天用得着格。原来汪先生送拨我礼盒,是挨个意思。杨爱拿台子浪、茶几浪格书整理起来,一叠一叠装进包裹里响;又拿零碎格生活用品一样一样拿出来看,再一件一件装到包裹里响。

上表:过兹一歇阿娟跟秋娘开门进来。秋娘坐到台子门前,拿一只小盒子放勒台子浪,从里响拿出一张契约。秋娘打开契约拨杨爱看。囡唔,挨格就是倷格卖身契。说完放到灯浪点燃烧脱。

下表:杨爱拿自家格描金盒子放到秋娘面前。姆妈,挨个就是我格赎身铜钿,倷收好吧。

上表:秋娘打开盒子看看,又拿盒子盖好。囡唔啊,倷出去过后打算哪哼生活?

下表:我想出去过后,用积蓄买一只船,雇一个船老大。如果有场花接受我落籍,我就买个小房子落籍,姆拨场花接受我落籍,我就勒海水浪漂泊。我到处拜访文人,求师交友,一可以提高我格文化修养,二可以从挨点人里响寻一个品性好格、尊重我格人结婚。

上表:好囡囡啊,倷当兹像伲挨种女人,就是赎得自由身,活勒世界浪是格样容易格。文人、官员、富商表面浪谦谦君子,实际一个比一个阴险。娘勿放心倷一个人出去闯荡。

下表:娘格好意,爱娘心领哉。自古红颜多薄命,但是我还想闯一闯。我要证明伲挨种风尘女人也是有才能格,也可以有跟平常女人一样格地位。

上表:既然挨样,格么娘祝倷成功。挨个盒子,倷收好吧。

下表:勿可以。

上表:倷收好吧,就当我送拨倷格嫁妆。

下表:杨爱又去抱牢秋娘。

上表:秋娘硬劲拿杨爱推开。倷马上准备好么事,今朝夜里就走。

下表:今朝夜里就走。我船也分买勒,喊我哪哼走?

上表:我已经安排好哉。就用倷平常乘格格只船。船老大跟俚儿子阿贵我也交代好哉,俚笃下来会得帮倷格。阿娟也要跟倷走,伍笃互相也好有个照顾。

下表:娘,我勿好白要倷格船跟人。再拿描金盒子推拨秋娘。

上表:我讲倷收好,倷就收好吧。囡囡啊,我希望倷可以逃出挨个恶命运,希望倷可以有比我更好格归宿,为伲挨种风尘女人争点气。娘也勿舍得倷走,勿是为兹娘赚铜钿。娘出高价买倷格日天,就勿是为兹赚铜钿,我怕倷落勒人家手里响,姆拨挨样好格命运。月娘死脱哉,几花姊妹死勒挨个火坑里响。倷现在勿得勿走。下半日,我喊阿娟去药店路浪就散布倷突发重病格消息。明朝,我去买只棺材,就讲倷已经死脱哉,我也顺兹挨个理由关门。勿晓得啊骗得过尤总兵格个恶狼。

下表:堂堂总兵,边关紧张,外国军队一直侵犯骚扰,俚勿敢去打,勒海伲挨种弱不禁风格女人身浪大发淫威。姆妈,我勿走哉,我陪倷度过难关。

上表:倷不要瞎讲哉。我勿是随便下挨种决定格,倷今朝被要走。

下表:我勿好让倷为我受牵连。我勿走。

上表:老照倷一直要赎身,现在我让倷走,倷又勿走。我勿是要倷作孽我,要倷留下来,才跟倷讲挨点闲话格。倷要晓得我格良苦用心,好好叫闯出倷自家格天地。

下表:我勿走,我就是勿走。随便倷哪哼讲我也勿走。我走兹我再也寻勿着倷挨样对我好格人哉。抱牢秋娘。

上表:秋娘要拿俚脱开。

下表:俚死死叫抱牢就是勿放。

上表:秋娘拿俚用力一推。啪。一记耳光敲勒俚面孔浪。倷个姆拨出息格么事。嗯——嗯——嗯——,抱牢面孔哭哉。

下表:姆妈——嗯——嗯——嗯——

上表:从我买倷开始,我从来分敲过倷,也分骂过倷。倷快点走吧,天亮再走要被人发现格。

下表:杨爱搭阿娟乘船逃脱哉。

  评论这张
 
阅读(54)| 评论(0)
推荐 转载

历史上的今天

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2017