注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

鹞语世界

想飞,那爱的情线却把我牵住……因为,我深深眷恋这片土地……

 
 
 

日志

 
 

孽生缘  

2014-10-25 14:52:34|  分类: 默认分类 |  标签: |举报 |字号 订阅

  下载LOFTER 我的照片书  |

第二回(交友)

上表:杨爱离开归家院,从此改名柳隐,字如是,号河东君。平常柳如是就着男装,阿娟就扮成书童。

上表:船老大问俚。爱娘,要到哪搭去?

下表:月底苏州复社要勒海虎丘集会。刚刚逃出盛泽,到同里格时光,就碰着松江州文人陈子龙、李待问,李待问还送拨我一幅俚格书法。俚笃又是复社格骨干。凭一面之缘,结交陈子龙、李待问,还可以让俚笃引荐结交更加多格文人。去松江州。

上表:船划到淀山湖。阿娟急哉。伲连搭陈公子、李公子格屋里勒海哪搭也勿晓得,哪哼去结交俚笃?

下表:我有办法让俚笃晓得,我柳如是到松江哉。

上表:啥个办法。

下表:倷拿李相公送拨我格书法拿出来,帮我备好笔墨。

上表:阿娟拿出来。

下表:柳如是开始临摹李待问格书法。落款还要写柳如是作诗,李待问书。第二天早浪,柳如是喊阿娟跟阿贵拿俚模仿格李待问书法拿到集市浪去卖。

上表:阿娟勿放心。爱娘。啊有人买格?

下表:有格,说勿定要卖光格。

上表:卖也分卖,倷哪哼晓得卖得脱?

下表:签格是李相公格名字,肯定有人会买。

上表:伪造人家作品,勿大好格吧。

下表:倷个丫头。有时光蛮聪明,有时光蛮戆。伪造格李相公书法勒海市面浪卖,李相公肯定会晓得,就会寻着卖伪造书法格人,勿就可以寻着我着。

上表:对格。我去卖。

下表:不要忘记脱,我是柳公子。

上表:阿娟跟阿贵寻着闹忙格场花,摊出一块布,拿书法放了布浪。路过格陌生人看见俚笃摆摊,围过来看哉。看见是李待问格书法,价钿又便宜,馋来买,一歇歇就卖光哉。回到船浪,阿娟跟柳如是讲,爱娘,伲拿得去格书法,一歇歇就卖光哉,倷看,伲卖着挨点铜钿。

下表:明朝集市有活动,来轧闹忙格人更加多,我再写一点,伍笃明朝拿过去卖,价钿好抬高点哉。

上表:好格。到第二天,阿娟搭阿贵到集市寻着格场花,开始摆出来。来买格人蛮多,阿娟跟阿贵收铜钿也来勿及。

下表:突然有一个佣人打扮格人朝人堆里响挤进来。让开,让开,让开,让开。走到书摊前头,一脚踏牢书卷。伍笃是啥人,敢勒海挨搭卖假冒李待问格书法,胆大包天。手伸出去要抓阿娟跟阿贵。

上表:阿贵朝俚面前一立,拿俚手撞开。倷哪哼?旁边阿娟要紧拿阿贵拉开。挨位小阿哥,倷有闲话就好好叫讲,还想动手。倷凭啥格讲,我挨个是假格。

下表:凭李待问就是我屋里老爷。

上表:买客开始吵起来。啥格,挨格李待问书法是假格。哪哼会是假格。俚笃两个人是骗子哇。阿娟开心哉,伲要寻李待问,俚格家仆格样快就寻着伲哉。既然倷是李府格家仆,倷啊敢带伲去寻李先生当面辨明。

下表:我就是要带伍笃两个无法无天格骗子去寻伲老爷发落。走,去见我屋里老爷。

上表:阿娟跟阿贵被家仆带到李府,从边门走进去,经过一条回廊,到兹一个院子里响。

下表:伍笃两个,勿许乱走,登勒挨搭等好。说完走到院子前头房子里响。

上表:家仆推门走进房子。

下表:啊呀。倷格个小贼胚,跟倷讲过几花遍哉,进来又勿敲门,吓得我一跳。

上表:小格有事体寻老爷,勿晓得夫人勒海。惊吓着夫人,小格该死,夫人恕罪,夫人恕罪。

下表:啥格事体。

上表:夫人,小格捉着两个卖假冒老爷书法格骗子。童仆长长短短拿经过跟李夫人讲兹一遍。

下表:有挨种事体。拿俚笃格卖格书法拨我看看。

上表:家仆托好一卷书卷交到李夫人手里。

下表:李夫人打开一看。啊。写得好,写得好!挨种神韵,挨种劲道,勿是一般人学得像格。老爷勒海后头茶室,快点去喊俚来。

上表:李待问一面孔光火,跑过来哉。

下表:相公。挨格真格是人才。

上表:挨个真格是无法无天!居然敢假冒我格名号去卖铜钿。

下表:相公。格两个卖书法格仆童估计吓着哉。倷看看挨种神韵,挨种劲道,连搭我也分勿清真假。倷一向惜才,心胸宽广,不要为难俚笃。说勿定,还可以跟俚笃结交成朋友唻。

上表:晓得哉。

下表:李夫人拿书卷交拨李待问。相公,倷看看。拿书卷还拨人家。说完走出去哉。

上表:李待问拿书卷朝旁边一丢。小赤佬,拿俚笃带进来。

下表:阿娟跟阿贵拨家仆带进房子。

上表:伍笃是啥人?居然敢假冒我格书法。

下表:李相公,倷忘记脱哉?倷搭陈相公一道来过伲格船,勒海同里格时光。伲屋里公子姓柳。

上表:噢——李待问摸一摸额骨头。我想起来哉,伍笃是河东君格书童。啥时光来格?哪哼勿先来寻伲?我跟陈兄还一直牵记着河东君。

下表:昨日刚刚到。伲勿晓得两位相公住格场花,姆拨办法,伲公子才想出挨个办法。

上表:李待问摇摇头。挨个柳公子。拿书卷拿过来看。哈,柳公子奇才奇才。

下表:门外头格人勒海喊,骗子出来,拿骗伲格铜钿还拨伲。

上表:哪哼桩事体。

下表:家仆凑勒李待问耳朵浪,拿经过讲兹一遍。挨时光阿娟跟阿贵讲。去拿铜钿退拨人家。

上表:李待问朝阿贵摆摆手,走出去。朝门口格人堆作揖。鄙人李待问,拜见各位乡邻。各位乡邻会集李府,有何贵干?

下表:李相公,有人卖假冒倷格书法作品骗伲。喊俚笃拿银子退拨伲。伲上当哉,李相公,一定要重罚格两个骗子。

上表:各位乡邻,误会误会。刚刚书摊所卖格书卷,馋是鄙人所写,送拨一个朋友格。朋友屋里格书童勿懂,错喊价钿,各位乡邻低价买着哉。请各位乡邻回吧。一作揖,回转去哉。

下表:哄了李府门口格买客勿吵哉。买着格蛮开心,分买着格有点后悔,慢慢叫散脱哉。阿娟问好李待问陈子龙格住址,李待问也问好柳如是格船停格位置,约好跟陈子龙一道去看柳如是。到兹李待问、陈子龙来拜访格日脚,柳如是换好女装,精心打扮好。

上表:阿娟进来禀报。两位相公来哉。

下表:柳如是到船舱门口候好。

上表:两个相公进来一看。哈,哪哼柳公子变成一个美女咋?两个相公呆顿顿朝柳如是作揖。

下表:柳如是还礼。

上表:陈子龙想。柳如是啊就是老照勒海酒馆里响跟朋友集会,朋友请兹一个乐伎,叫杨爱。格个杨爱特别漂亮,琴弹得特别好。哪哼勒海同里分看出来。

下表:柳如是请两个相公坐下来。李先生,柳隐冒犯先生名号,实属无奈,柳隐向倷请罪哉。

上表:啊呀。我勿晓得应该哪哼称呼倷哉,还是喊倷柳兄吧。柳兄啊,倷不要自责。柳兄勿拘常规,出奇法寻我跟子龙两人,鄙人十分欣赏。柳兄格书法勿比我坍扮,倷勿需要自责。

下表:谢谢李兄宽谅。

上表:三个人畅谈朝政腐败、文人会社格发展、外国对明国格威胁,还有国内流寇搭农民起义。李待问搭陈子龙蛮佩服,想勿着一个女人会得有如此见解。陈子龙问,柳兄要勒海松江长住还是短住?

下表:还分定勒。三个人屏兹一歇。柳如是讲。我告诉伍笃吧。拿俚从被老鸨买下来到逃出归家院,遭遇兹啥格事体,哪哼反抗迫害,长长短短全部告诉两个相公。跟我挨样一个女人称兄道弟,有损两位相公格名誉。

上表:柳兄,不要格样讲。两个男人一道讲出来。陈子龙讲,柳兄如果觉着松江适合,就勒海此地长住吧。我定当尽力相助。李待问也讲。有啥困难,柳兄尽管来寻我,我格名号,柳兄如果需要,尽管用。

下表:谢谢两位阿哥。

上表:陈子龙吃一口茶。伲准备选一个时光,请更加多格复社社友勒海南园楼,拿倷引荐拨俚笃,倷可以接触着更加多格松江文人。等到筹备好,就来请倷。

下表:谢谢两位兄长关心。

上表:到兹南园楼集会格时光,李待问拿柳如是接到南园楼。李待问勒海饭店门口喊一声。客人到。

下表:柳如是一身男人打扮,走进来。坐勒旁边格复社文人馋看得呆脱。格个男人打扮格人,比多数女人也漂亮。

上表:陈子龙走过去,跟柳如是一个一个介绍。客套闲话讲光,陈子龙拿柳如是引到座位浪。柳如是刚刚坐下去,俚隔壁格朋友立起来,自我介绍。学生宋征舆,鄙字辕文。河东君光临,我辈不胜荣幸。陈子龙马上介绍。宋兄是松江格少年才子。

下表:柳如是朝宋征舆作揖。抬眼睛朝俚一看,噢哟,心脏突然抖一抖,赛过痉挛,眼睛马上朝边浪歪开。格个男人漂亮。柳如是见过勿少男人,还姆拨一个男人让俚格样感觉有点难为情。

上表:宴会开始。大家吃酒畅谈。

 

  评论这张
 
阅读(32)| 评论(0)
推荐 转载

历史上的今天

在LOFTER的更多文章

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2017